1 January 2026 in МАТЕМАТИКА, ФИЗИКА ЖӘНЕ ИНФОРМАТИКАНЫ ОҚЫТУДЫҢ ӨЗЕКТІ МӘСЕЛЕЛЕРІ
Мақалада жалпы білім беретін мектептердегі физика сабақтарына STEMәдістерін кіріктірудің теориялық және практикалық аспектілері қарастырылады. STEM (Science, Technology, Engineering, Mathematics) тәсілі оқушылардың ғылыми-техникалық ойлауын, зерттеушілік қабілеттерін және инженерлік дағдыларын дамытуға бағытталған заманауи білім беру технологиясы ретінде сипатталады. Зерттеу барысында 7-9 сыныптарға арналған физика оқулықтарының мазмұнына талдау жасалып, зертханалық жұмыстар саны мен олардың STEM талаптарына сәйкестігі анықталды. Нәтижесінде 7-8 сыныптарда тәжірибелік жұмыстар жеткілікті деңгейде қамтылғаны, ал 9-сыныпта олардың саны шектеулі екендігі айқындалды. Осыған байланысты 9-сынып физика курсына STEM-жобаларды енгізудің қажеттілігі негізделді. Мақалада оқушылардың теориялық білімдерін тәжірибемен ұштастыруға бағытталған бірқатар STEM жобалар ұсынылған: центрге тартқыш үдеуді анықтау, айналмалы қозғалысты зерттеу, қарапайым лифт моделін құрастыру, реактив арба жасау, акустикалық кабина жобалау және перископ құрастыру. Бұл жобалар оқушылардың физикалық құбылыстарды терең түсінуіне, эксперимент жүргізу дағдыларын қалыптастыруға және пәнаралық байланыстарды жүзеге асыруға мүмкіндік береді. Сонымен қатар, мақалада STEMәдістерін енгізудің артықшылықтары мен шектеулері талданып, Қазақстандағы білім беру жүйесінде оны тиімді жүзеге асырудың негізгі бағыттары айқындалған. STEM тәсілі физика пәнін оқытудың сапасын арттырып, оқушылардың пәнге қызығушылығын күшейтетін тиімді құрал ретінде қарастырылады.